جيتك مثل طفلن له ايام محــــروم

جيتك مثل طفلن له ايام محــــروم

افتح شبابيك الهوى جيتـك اليــــوم
بحساس من زود الوله احسه يطير
جيتك مثل طفلن له ايام محــــروم
عن حضــن امه بعدته المقاديــــر

وجيتك مثل عودن له ايام مهمــوم

وده يلاقي باخر الــوقت تقديـــر
وجيتك حضن عاشق وهايم ومغروم
وده يضمك لين تصبح على خيـــر

متى تحس ان الهوى شي مقسوم
من قسمة الخالق على خلقه يصير
ومتى تحس اني لك اطيح واقـوم
واتعب على شانك واقدرك وآغير

لي في هواك احلام وامال وعلوم
واحزاب واصحاب وقصيد وجماهير
وهموم وافكار وهواجيس وحلوم
ودروب واخطار وعذاب ومشاوير

وحب وغلا واخلاص ومعاند ولوم
واحساس والهام وشعور وتفاكيـر
وصحبة سهر ومقاطعة لذة النوم
واشـواق جياشه وعشق وتعابيـر

في ذمتك مابان لك شي مكتـوم
من بعد ماصورت الاوضاع تصويــر
لاتحسب انك شي عابر ومعـدوم
وتاريخ حبك فاق كل الاســاطــير

كني لقيتك بأغنيه لأم كلثــــوم
وكني قريتك في رواية شكسبيــر
في كل شي اتخيلك واسمعك دوم
واتأملك في الوقت الأول ولآخيـــر

من ماضي الأيام لايومك اليـــــوم
وغـــلاك عندي ماحصل فيه تغييـــر
وانا لك الله ماأقبل البيع والسوم
ولا ارضى علي ولاعليك المخاسيــر

لاْني الوحيد اللي على بحرك يعوم
واللي عرف مرساه في رحلة السير
لحظه حبيبي قبل يسبقني النوم
بضمك لصدري لين تصبح على خير